Banjat e Dibres Capa

Edhe pse njeriu jeton dhe zhvillohet në një mjedis të thatë, uji është çelsi kryesor për shendetin dhe mirëqenien tonë. Mbi 60 përqind e peshës së trupit tonë është ujë, çdo qelizë e trupit në brendësi ka lëng i cili përbëhet nga uji dhe gjithashtu shtresa mbrojtëse e tyre kryesisht përmban ujë. Çdo organ, çdo ind dhe çdo proçes jetësor në trup si: të menduarit, funksionimi i nervave, qarkullimi i gjakur, lëvizja si dhe tretja e ushqimit kërkojnë ujin si materie për të funksionuar. Një rol mjaft të rëndësishëm në shëndetin e njeriut luajnë edhe ujërat termo-minerale, që mund të definohen si burime uji me temperaturë të lartë që permbajnë shumë minerale, gazëra dhe avull, dhe që shkaktojnë efekte specifike terapeutike në trupin e njeriut. Ata janë një dhuratë e paçmuar nga toka, janë 100% natyrale dhe vetëm duke kuptuar vlerat e tyre shëruese, ne mund të mësojmë fuqitë e tyre magjike të cilat ofrojne shërim por edhe kënaqësi në të njejtën kohë. Dibra ka dy “thesare” me ujëra termo-minerale, Banjishtin dhe Kosovrastin, me një histori disa shekullore. Sot në këto lokalitete ndodhen 2 hotele të mrekullueshme, të cilat nga jashtë ruajnë këtë histori dhe tradite shekullore, por në brendësi janë bashkëkohore dhe ofrojnë një ambient luksoz, me standarde të larta të shërbimeve hotelierike, që i përmbushin kërkesat e të gjithë shtresave të shoqërisë.