Parokia Di Suffisant

LEKTURA DI DIA
7 di òktober 2026
Djárason di e di 27 siman di Tempu Ordinario.
Memoria di Nos Señora di Rosario.

PROMÉ LEKTURA: Galatanan 2:1-2,7-14
'Dieskuater aña despues mi a bolbe bai Herusalèm ku Barnabas i mi a hiba Tito tambe huntu ku mi. Mi a bai pasobra Dios a indiká mi esei. I den un reunion privá ku esnan konsiderá kabes di iglesia na Herusalèm, mi a splika kontenido di e bon notisia ku mi ta prediká na esnan no hudiu. Mi a hasi esei pa mi sa si mi trabou, sea den pasado òf presente, no ta enbano. Nan no a bisa nada, al kontrario, nan a mira ku Dios a duna ami e tarea pa prediká e bon notisia na esnan no hudiu, meskos ku El a duna Pedro e tarea pa prediká na esnan hudiu. Pasobra e mesun Dios ku a hasi mi apòstel pa esnan no hudiu a hasi Pedro apòstel pa esnan hudiu. Hakobo, Kefas i Huan, konsiderá di ta pilá di iglesia, a rekonosé ku Dios a duna mi e tarea spesial akí i nan a duna ami i Barnabas man komo muestra ku nan ta solidario ku nos. Nos a palabrá ku nos lo traha serka esnan no hudiu i nan serka esnan hudiu. Loke nan a pidi nos sí ta pa kòrda riba e hudiunan den nesesidat i esei ta nèt loke mi mes semper a tene kuenta kuné. Pero un dia ku Kefas a bini Antiokia, mi a haña mi ta skual e den su kara, pasobra el a hasi algu robes. Promé ku algun hende di Hakobo a bini einan, e tabatin kustumber di kome bon bon huntu ku e no hudiunan. Pero ora e hendenan ei a yega, el a kita pia pokopoko for di e no hudiunan te stòp di kome huntu ku nan. E tabatin miedu di esnan ku ta propagá ku kreyente no hudiu tambe mester ta sirkunsidá. E otro hudiunan kreyente tambe a djòin Kefas den e hipokresia akí. Kos a bai asina leu ku asta Barnabas mes tambe a laga nan influensi'é i a hasi meskos. Pero ora mi a ripará ku nan no tabata komportá nan den un forma korekto, ku ta kuadra ku bèrdat di e bon notisia, mi a bisa Kefas dilanti di tur hende: ‘Abo, ku ta hudiu mes, a bini ta biba segun kustumber no hudiu! Anto pakiko bo ke obligá esnan ku no ta hudiu sí biba segun kustumber hudiu? '

SALMO RESPONSORIAL: Salmo 117:1bc, 2
Respuesto — Marko 16:15: “Pasa rònt mundu i prediká e bon notisia na henter humanidat.”

''Alabá SEÑOR, tur nashon, tur pueblo, kanta su gloria! Su amor i bondat pa nos ta grandi i fieldat di SEÑOR ta eterno. Alabá sea SEÑOR!'

ALELUYA: Romanonan 8:15
Pasobra e Spiritu ku Dios a duna boso no ta hasi boso katibu pa boso bolbe biba ku miedu. Nò, ta e Spiritu ku ta hasi boso yu adoptá di Dios; ta pa medio di djE nos ta sklama na Dios: ‘Abba, Tata!’

SANTU EVANGELIO: Lukas 11:1-4
Un bia Hesus tabata resa na un sierto lugá. Ora El a kaba di resa, un di su disipelnan a bis'É: ‘Señor, siña nos resa, manera Huan a siña su disipelnan.’ Hesus a bisa nan: ‘Ora boso ta resa, bisa: Tata, bo nòmber sea santifiká; laga bo reino bini. Tur dia, duna nos nos pan di kada dia i pordoná nos nos pikánan, pasobra nos ta pordoná tur hende ku a falta ku nos; i no laga nos kai den tentashon.’

Pa motibu di problema ku suministro di koriente, nos no lo tin transmishon awe.

LEKTURA DI DIA
6 di òktober 2026
Djamars di e di 27 siman di Tempu Ordinario.

PROMÉ LEKTURA: Galatanan 1:13-24
Boso a tende tòg kon mi tabata biba tempu mi tabata sigui religion hudiu; sin mizerikòrdia mi tabata persiguí iglesia di Dios i tabata buska pa destruyé. Den religion hudiu mi tabata progresá mas ku hopi otro hudiu di mi mes edat den siguimentu di e tradishonnan di mi antepasadonan, pasobra mi tabata mas zeloso ku nan tur. Pero Dios ku a skohe mi i ku den su bondat a yama mi, a hiba di gustu di revelá su Yu den mi bida. El a hasié pa mi prediká e evangelio tokante E na esnan no hudiu. Ora esaki a sosodé, mi no a kore pidi niun hende konseho. Tampoko mi no a kohe kaminda pa Herusalèm bai serka esnan ku tabata apòstel promé ku mi, pero mi a bai Arabia i despues Damasko bèk. Tres aña despues mi a bai Herusalèm pa sera konosí ku Kefas i a keda diessinku dia serka dje. Mi no a mira niun otro apòstel sino Hakobo, ruman di Señor. Dilanti di Dios mi ta sigurá boso ku loke mi ta skibi ta bèrdat! Despues mi a bai bish*tá algun region na Siria i Silisia. Pero e rumannan den Kristu di e iglesianan na Hudea sí no tabata konosé mi personalmente. Tende nan a tende hende bisa: ‘Ántes e hòmber akí tabata persiguí nos, i awor at'é ta prediká e mesun fe ku e ker a destruí!’ Anto e ora ei nan tabata alabá Dios pa loke a sosodé ku mi.

SALMO RESPONSORIAL: Salmo 139:1b–3, 13–14ab, 14c–15
Respuesto — Salmo 139:24b “guia mi p'e kaminda eterno!”

'B'a saminá mi, SEÑOR, i konosé mi. Bo sa si mi ta kana o drumi, unda ku mi bai, Bo sa.
Sí, B'a forma mi te den mi mondongo, Bo a hila mi den barika di mi mama. Mi t'alabá Bo pasobra B'a traha mi di un manera asombroso, un milager.
Hundu den mi kurason mi sa esei. Bo sa kon mi organismo a forma, kon mi ta'ta krese den skondí, bunita di flèktu den barika di tera. '

ALELUYA: Lukas 11:28
Hesus a rospond'é: ‘Mas felis ainda ta esun ku tende palabra di Dios i obedes'é.’

SANTU EVANGELIO: Lukas 10:38-42
Hesus i su disipelnan tabata sigui nan kaminda i El a drenta un sierto pueblo. Un muhé ku yama Marta, a risibiÉ den su kas. E tabatin un ruman muhé ku yama Maria. Maria a kai sinta na pia di Señor i tabata skucha su palabra. Marta tabata mashá okupá ku e kos di hasinan. El a bai bisa Hesus: ‘Señor, no ta importá Bo ku mi ruman ta laga mi so hasi trabou? Bis'é bin yuda mi!’ Señor a kontest'é: ‘Marta, Marta, bo ta preokupá i den tenshon pa hopi kos, ma ta un kos so ta nesesario. Maria a skohe e mihó parti i lo no kita esei for di dje.’

“Empeñá pa kos di shelu i no pa kos di e mundu akí.” (Kolosensenan 3:2)

Awe e teksto bíbliko ta invitá nos pa nos ser nos mes den presensia di Dios, dilanti di Kristu i komo un hende di fe.

Bo mester konosé bo mes, konosé e kosnan ku hopi biaha nos ta lucha pa nan i ku nan ta kita nos for di e kaminda di Dios.

Konosé bo mes i wak kuantu kos bo mes a purba di optené i ku bo a lucha pa risibí nan, pero ora bo tin nan, nan no ta hasi bo felis.

Bo konosé bo mes i sa kuantu hende bo a tuma na malu pa kosnan di mundu i ku te ainda bo no ta papia ku nan.

Bo konosé bo mes i mira kuantu tempu bo a pasa, kuantu ora bo a gasta, i hasta a kosto di bo fe, i awor loke bo a lucha p'é ta tirá den koi sushi.

Bo konosé bo mes; wak kuantu kos di mundu bo tabata deseá i ku bo a neglishá hende i Dios, i awor bo ta konsiderá nan potoshi.

Bo konosé bo mes; wak kuantu kos bo a keda ferfelá den bida riba dje, pero awor bo ta wak rònt di bo i bo no ta mira nan.

Bo konosé bo mes i bo sa kuantu situashon a presentá den bo bida i ku bo a rabia, enbes di mira e kara di Kristu den nan.

Mi ruman, abo ku konosé bo mes sa ku e úniko kos ku ta ei pa semper i ku lo duna bo bida ta Dios.

P'esei, abo ku konosé bo mes, buska Dios. Buskando Dios, bo ta risibí tur kos, inkluso un bida nobo i un komienso nobo.

Abo ku konosé bo mes, puntra bo mes: “E kos akí ta hiba mi shelu?” Si e no ta hiba mi shelu, anto mi no mester di dje den mi bida.

LEKTURA DI DIA
Djaluna, 5 di òktober 2026
Di 27 siman den Tempu Ordinario

PROMÉ LEKTURA: Galatanan 1:6-12
Mi a keda hopi asombrá ku den korto tempu asina ya boso a bandoná e Dios ku a yama boso pa medio di e grasia ku ta bini dor di Kristu. Boso a bandon'É pa sigui un otro supuesto evangelio. En realidat no tin otro evangelio. Loke ta pasa ta ku tin algun hende ta bruha boso i ta trata di kambia e evangelio tokante Kristu. Pero asta si nos mes òf un angel for di shelu prediká un otro evangelio na boso, diferente for di esun ku nos a prediká kaba, maldishon di Dios kai riba dje! Mi a bisa un be kaba i awor mi ta ripití: Si kualke hende mester prediká un evangelio ku ta diferente for di esun ku boso a aseptá, maldishon di Dios kai riba dje! Ta aprobashon di hende mi ta buska? Nò, ta aprobashon di Dios! Ta popular mi ke ta den bista di hende? Nò, si tabata asina, lo mi no tabata sirbidó di Kristu. Laga mi pone na boso konosementu rumannan, ku e evangelio ku mi a prediká no ta algu ku hende a inventá. Mi no a risibí e bon notisia akí di hende ni niun hende no a siña mi e, sino mi a hañ'é pa medio di un revelashon di Hesu-Kristu.

SALMO RESPONSORIAL: Salmo 111:1b–2, 7–8, 9, 10c
Respuesto — Salmo 111:5 «rekordando su aliansa eternamente.»

'Mi ke gaba SEÑOR di kurason, den kompania, den reunion di fielnan. Grandioso ta SEÑOR su obranan, digno di estudio pa ken ku stima nan.
Loke E ta hasi ta korekto, manera mester ta, tur su mandamentunan ta digno di konfiansa; nan ta fiho i ta konta pa tur eternidat, duná ku derecho i di akuerdo ku bèrdat.
El a duna su pueblo libertat, a ordená su aliansa pa semper. Su nòmber ta ‘Dios Santu i temibel’. Tur esnan ku hasi esei tin sano huisio. Alabansa di Dios lo n' kaba nunka.'

ALELUYA: Huan 13:34
Mi ta duna boso un mandamentu nobo: Stima otro! Manera Ami a stima boso, asina boso tambe mester stima otro.

SANTU EVANGELIO: Lukas 10:25-37
Un eksperto di lei a bin papia ku Hesus, pa purba laga Hesus kai den trampa. El a puntr'É: ‘Maestro, kiko mi mester hasi pa risibí bida eterno?’ Hesus a kontestá: ‘Kiko ta skibí den Skritura? Kiko bo ta lesa eiden?’ El a bisa Hesus: ‘ “Stima Señor, bo Dios, di henter bo kurason, ku henter bo alma i ku tur bo forsa” i “Stima bo próhimo manera bo ta stima bo mes.” ’ Hesus a bis'é: ‘Bo ta korekto. Hasi e kosnan akí i lo bo biba!’ E eksperto di lei, ku ker a hustifiká su mes, a puntra Hesus: ‘Ma ken ta mi próhimo?’ Hesus a kontest'é: ‘Un dia tabatin un hòmber ku a baha for di Herusalèm bai Yériko. El a kai den man di bandidu; nan a kita tur kos for di dje, dun'é un halá di sota i bai lag'é kasi morto bentá abou. Awor a sosodé ku un saserdote tabata baha p'e mesun kaminda. Ora el a mira e hòmber, el a krusa kaminda pasa bai laga e hòmber. Un levita tambe a yega na e lugá ei, mira e hòmber; krusa kaminda pasa bai lag'é. Ma un samaritano, ku tabata biaha, a yega kaminda e tabata. Ora el a mir'é, el a haña duele di dje. El a bai serka e hòmber, hunta su heridanan ku zeta i biña i mara nan. El a pone e hòmber riba su bestia di karga, hib'é un posada i kuid'é. Su manisé, e samaritano a saka dos moneda di plata duna e doño di posada. El a pidié: “Kuid'é i si bo tin mas gastu kuné, mi ta paga bo esei ora mi bini bèk.” ’ Hesus a konkluí: ‘Awor kua di nan a aktua komo próhimo di e hòmber ku e bandidunan a ataká?’ E eksperto di lei a rospondé: ‘Esun ku a mustr'é mizerikòrdia.’ E ora ei Hesus a bis'é: ‘Bai i abo hasi meskos!’

LEKTURA DI DIA
4 di òktober 2026
Di 27 Djadumingu den Tempu Ordinario

PROMÉ LEKTURA: Isaías 5:1-7
Ta kanta mi ke kanta di mi bon amigu, un kansion di mi amigu ku su hòfi di wendrùif. Mi amigu tabatin un hòfi di wendrùif riba un tereno fértil na barika di un seru. El a bòltu tera, saka tur piedra afó i planta mata di kalidat ekselente. Meimei di e hòfi el a lanta un toren i el a koba un baki pa machiká e drùifnan. El a spera ku e hòfi lo a produsí fruta dushi, ma ta blo bèshi shimaron so el a duna. Mi amigu a bisa: ‘Ban mira, habitantenan di Herusalèm, hendenan di Huda, husga awor kua di nos dos tin falta, mi hòfi di wendrùif o ami. Kiko mas mi por a hasi pa mi hòfi? Ami a spera ku l'e produsí bon fruta, anto pakiko ta blo bèshi shimaron so el a duna? Anto awor mi ta bai splika boso bon kla kiko mi ta bai hasi ku mi hòfi. Mi ta bai kita su tranké, baha su muraya, pa bestia drenta destruyé, pa nan drenta trap'é. Lo mi lag'é bira mondi será kaminda no ta snui ni ranka yerba mas. L'e bira un k**a di sumpiña i bringamosa. Lo mi prohibí nubianan di manda awa riba dje.’ Wèl, e hòfi di wendrùif di SEÑOR soberano ta pueblo di Israel, su planchinan skohí ta e hendenan di Huda. El a spera derecho, pero t**a ku mal echo, El a spera hustisia, pero at'é gritu: ‘Inhustisia!’

SALMO RESPONSORIAL: Salmo 80:8,11-15,18-19
Respuesto — Isaías 5:7a.: «Wèl, e hòfi di wendrùif di SEÑOR soberano ta pueblo di Israel»

'B'a saka un mata di wendrùif fo'i Egipto, B'a plama pueblonan fo'i otro pa plant'é. Te na laman el a saka su ramanan, te na Eufrat su spreitnan. Di kon B'a tumba su kurá di piedra, pa ken ku pasa por a kohe su frutanan? Pa porkonan di mondi dispidié i bestianan feros kom'é hasié limpi limpi? Dios di universo, bolbe! Mira abou for di shelu, ripará! Bin atendé ku bo mata di wendrùif ku bo man drechi a planta komo planchi: bo mes yu ku B'a duna fortalesa. anto nos lo n' bandoná Bo nunka mas. Duna nos bida i nos lo invoká Bo! SEÑOR, Dios di universo, trese un kambio pa nos! Mira nos ku bista di kariño i nos lo ta salbá!'

DI DOS LEKTURA: Filipensenan 4:6-9
No preokupá pa nada, sino den tur sirkunstansia presentá boso petishonnan na Dios den orashon i semper ku gradisimentu. I e pas di Dios ku niun hende no por komprondé, lo warda boso kurason i mente den union ku Kristu-Hesus. Pa konkluí, rumannan: pensa riba tur loke ta berdadero i noble, hustu i puru, agradabel i honorabel. Si tin kiko ku ta, ku ta bon i ku ta digno di alabansa, pensa riba eseinan. Pone loke boso a siña, risibí, tende i mira di mi, den práktika. I Dios ku ta duna pas, lo ta huntu ku boso.

ALELUYA: Huan 15:16
No ta boso a skohe Mi, ma ta Ami a skohe boso i Mi a apuntá boso pa bai i karga hopi fruta; fruta ku ta keda. Loke boso pidi Tata den mi nòmber, E ta duna boso.

SANTU EVANGELIO: Mateo 21:33-43
Tende un otro parábola akí! Un dia tabatin un doño di kunuku ku a planta un hòfi di wendrùif. El a ser'é ku un tranké i a traha un baki pa machiká wendrùif. Tambe el a traha un toren di vigilansia. Despues el a hür e hòfi ku algun kunukero sali di biahe. Ora tempu di kosecha a yega, el a manda su kriánan bai tuma su frutanan serka e kunukeronan. Sinembargo e kunukeronan a gara e kriánan; nan a duna unu un halá di sota, un otro nan a mata i un di tres nan a piedra. E doño a bolbe manda otro kriá serka nan, e bia akí mas tantu ku e promé bia i nan a hasi meskos ku nan. Al fin i al kabo e doño a manda su yu. El a pensa: “Mi yu sí nan lo respetá!” Ma ora e kunukeronan a mira e yu, nan a bisa otro: “Esun akí ta e heredero! Ban, laga nos kaba kuné, ya nos ta haña su herensia!” Nan a koh'é tene, tir'é pafó di e hòfi i mat'é. Ora doño di e hòfi yega, kiko lo e hasi ku e kunukeronan?’ Nan a kontestá: ‘Lo e sòru pa e malechornan ei muri un mal morto i pasa e hòfi pa otro kunukero, ku lo dun'é su parti na ora di kosecha.’ Hesus a bisa nan: ‘Nunka boso no a lesa e palabranan akí den Skritura? E piedra ku e trahadónan a rechasá, a bira piedra prinsipal; ta trabou di Señor esei, algu milagroso pa mira! P'esei Mi ta bisa boso: lo kita reino di Dios for di boso i entreg'é na un pueblo ku ta duna fruta.