QUSAR

Azərbaycanın “şimal qapısı” QUSAR ən hündür zirvələri, yüksək səviyyəli dağ-xizək kurortu, gözəl dağ kəndləri, ləzzətli ləzgi mətbəxi və Qafqaz dağlarının heyranedici təbiəti ilə seçilir. Azərbaycanın şimal-şərqində və Dağıstanla həmsərhəd olan Qusar rayonu Böyük Qafqaz dağlarının ətəklərində, Qusar maili düzənliyində yerləşir. Azərbaycanın ən hündür nöqtələri olan Bazardüzü (4466 m) və Şahdağ (4242 m) zirvələri, eləcə də məşhur Şahnabad yaylağı Qusar rayonunun ərazisindədir. Samur-Abşeron kanalı, Qusarçay, Samur çayı, eləcə də Rusiyaya gedən başlıca avtomobil magistralı rayonun ərazisindən keçir. Rayonun şimal inzibati sərhəddi Samur çayından, şimal-qərb, qərb və cənub-qərb inzibati sərhədləri Böyük Qafqaz silsilələrindən, cənub inzibati sərhədləri isə Qusarçay vadisindən keçir. Şərq tərəfdən inzibati sərdəhlər Qusar maili düzənliyi ilə Şollar düzünün kəsişdiyi əraziyə qədər uzanır.
Ərazisinin əksəriyyəti valehedici dağlardan 20%-i meşələrdən ibarətdir. Yerli əhalinin mütləq əksəriyyətini Qafqazın ən qədim köklü xalqlarından və Qafqaz Albaniyası varislərindən sayılan ləzgilər (leqlər, лекьер) təşkil edir. Azərbaycanda mövcud olan 9 iqlim tipindən 4-nə Qusar rayonu ərazisində rast gəlinir. İqlimi düzənlik və dağətəyi hissədə mülayim isti, yüksək dağlıqda soyuq və rütubətlidir. İllik yağıntıların miqdarı 350–1500 mm-dir.